Cha a pourtant quemincher pareil, puisque ch’ éto eul 25 décembre comme tous les ans, chéto l’ hiver comme toudis din nous contré et les éfants y z’étotent v’nus pour passer Noël in famille, tranquillemint comme des éfants bien saches.
.
Eusse, y’ n’passent pon par eul queminée, y rintent par eul porte et si te savos sin qui vien/tent t’ annoncer, y z’arsortirotent par eul ferniète…. Mais non, cha n’ est pon vrai, ch’ éto juste pour moutrer que j’ savo dire toutes les issues de m’ baraque in patois.
A Noël, in arrive toudis à un momint qui fait du plaisi à ches gosses et à ches parints aussi, ch’est l’ distribution des cadeaux.
Mais ch’ t’année, y z’ont fait fort !!! Déjà qui z’ ont jamais fait un présent aussi lourd, mais in puque, y t’ posent cha d’sus tes genoux avec délicatesse et heureusemint, sinon t’ auros les 2 gambes sectionnées tellemint la chose est monumentale.
A croire qu’ ils n’ veulent pon que te t’ lèves à ch’t’heure.
Là, ch’est réussi, aveuque in/ne enclume eud d’sus tes g’noux, t’es collé à t’chaise !!!
Bin ouais, t’es poli, t’ as laiché ches fauteuls à ches gosses, ti t’ a été élevé d’sus in/ne ca/yelle, alors.. t’as pris in/ne… ca/yère.
Pour que vous comprenez bin, y faut continuer à vous décrire l’ action.
Aveuque cha d’sus ti, te pinses que ches gosses y t’ ont offert des altères pour effacer tes tiots bourrelets, et tout in souriant, te t’dis déjà qu’cha va arjointe tous les largesses des années passées qui n’ ont été ouvertes qu’ in/ne fo, mais que cha auro été malpolis d’ arfuser.
Ch’t’année, non seulemint y z’ ont mis l’poids, mais y z’ ont mis les formes.
Les années précédentes, t’ avos drot à in/ne étiquette eud’sus ch’ paquet, mais cheul fos ichi, pon question, t’as drot à in/ne inv’loppe aveuque tin nom écrit au stylo doré, aveuque in/ne pleume in or in quelque sorte, tin nom et t’ n’ adresse comme si t’ éto atteint d’ Alzheimer et qu’ te savo pu d’ù qu’ ch’ est que te vis. Et in plus, y z’ apportent cha à t’baraque. Donc ch’ est presque sûr que ch’ est tin cadeau.
Alors, pourquoi ? me direz-vous.
Mais pourquoi pas, vous répondrai-je. Ce sont mes enfants et ils font ce qu’ ils veulent pour me plaire à moi, pas à vous.
Surpris par la présentation, t’ arviète les autes, et te vos qu’ eusse aussi y z’ont eu drot à tout l’ saint frusquin : cadeau, inv’loppe, stylo doré et tout l’ tralala et tra-la-lère.
Donc, ch’t’année, y z’ont dû mette ch’l’ étiquette din l’ inveloppe, à croire qui z’ ont arvindu leu jours de RTT pour aquatter des inv’loppes.
Comme diso l’ présidint d’
Une nouvelle fois, je ne vois pas en quoi cela peut vous déranger.
Vous êtes quand même terribles à vouloir toujours commenter ce qui se passe chez moi. Je vous fais l’ honneur de vous prendre pour confidents, c’ est déjà pas mal, et ça devrait vous inciter à un peu plus de retenue.
C’ est un monde tout de même.
Tenez-vous bien…Non, mieux que ça… Sinon vous ne saurez jamais la suite.
Vous avez quand même de la chance que je vous aime bien, alors je vais continuer.
Résumé des épisodes précédents : y sont t’arrivés, y z’ ont fait in/ne baisse à tertous, y z’ ont bu un coup, y z’ ont arbu un co, et y z’ont… arrêté d’boire.
Je n’ supportero pon un aute buveux qu’ mi à m’ mason, donc, y z’ ont pu bu, et mi non pu… Quo qu’ ch’ est qu’ vous pinsez d’mi ? Je n’ sus pon comme vous, quo qu’ vous cro/yez, j’ sais m’ arrêter d’ boire… intre deux verres, quand j’ veux et que l’ boutelle est vide. J’ va quand même pon risquer eud dégringoler din m’ cave, uniquemint pour vous faire rigoler… je n’ sus pon si biète !!!
Vous pouvez boire à m’ santé, mais pon question eud rire à mes dépinds.
J’ arprinds. Quand chacun eut bu sin compte eud’ sus min compte, offrande offerte d’sus mes g’noux, enveloppe fermée d’ sus le cadeau.
Voilà, Madame, vous nous avez rattrapés, in éto arrivés là au momint de décach’ter euch l’ inv’loppe.
Ch’ est l’ heure eud la remise des césars et des oscars.
And the winner is ???.
Comme si ch’ éto in/ne surprise, ch’ cadeau y’ est là, d’ sus mes genoux, donc
ch’est à mi, j’ sus pon complètemint inochint !!!
Quoqu’ in trove din ch’ l’ inveloppe ? je n’vous l’ deminte pon, puisque ch’jour là, vous n’ étotent pon là, donc vous n’ pouvez pon savoir.
Mais mi, j’y éto, et j’ fais durer eul suspinse autant que cha m’ plait.
Je vous dirai sin qu’ y avo din l’ inveloppe quand vous arrêterez eud m’ arvétier avec vous yux !!!
D’ in aute côté, et in y réfléchissant bin, je n’ vo pon avec quoi d’ aute vous pourrotent eum’ raviser.
J’va donc arrêter eud vous imbêter et j’ va sans pus tarder vous dire sin qu’ y’avo din ch’ l’inveloppe écrite aveuque ? … un stylo doré, y n’a deux qui suivent.
Eh bin, din l’ inveloppe j’ a treuvé un carton plo/yé in deux, ou plutôt pour parler bin, un bristol, oui madame, in bristol in carton, ou un carton en bristol, ch’ est comme vous voulez. Mais, n’ oubliez pon, plié in 2.
Là, chti qu’ y a préparé l’ inv’loppe y dot savoir qui jue avec tes nerfs, puisque y’a marqué eud’ sus l’ bout d’ carton : « à ouvrir calmemint et aveuque précaution ».
Ce qui, vous l’ admettrez, a le don eud vous énerver acore un peu puque.
Pour vous-même, vous vous dîtes :
« y z’in font bin des m’ noulles avec leu cadeau !!! Quand y z’étotent tiots, eusse y mettotent chinque secondes pour exploser l’ imballage.
Mais ch’t’ année, eul distribuache eud cadeau d’ Noël, in l’fait à l’ américaine, aveuque mise en scène et tout l’ tralala.
Y’a des plaisits qu’ in aime faire durer, si cha n’vous fait pon du bien à vous, cha n’ fait pon toudis du ma à l’ aute, mais là j’voudro bin avoir fini d’ ouvrir mes paquets avant d’ minger mes chocolats …eud Pâques.
Cha y’est, l’ inveloppe elle est ouverte par chacun des participants à l’ opération du Noël des « désénervés ».
Bristols z’ aux couleurs de l’ hiver, l’ un avec un Père Noël, l’ autre avec un bonhomme de neige et l’ mien aveuque un sapin. Et pourquoi qu’ ch’ est justemint sur mi que ch’ sapin y quet. ? y sont pressés de me l’ faire goûter ? ou bin y z’ ont’y envie de m’faire comprinte qu’ y sont prêts à hériter ?
Toudis est t’y que mi ch’est l’ sapin, avec in/ne guirlande, mais pon d’ bouton pour l’ faire clignoter.
Din l’ même geste et l’même instant, tous cheusse qui ont arçu in/ne carte pliée in 2 y z’ euffent leu bristol.
Et là, que surprise : in t’ annonce que ch’ est Noël, qu’ in t’souhaite un bon Noël …et pon des joyeuses Pâques. Cha fait du plaisi d’apprinte que tes éfants y savent que ch’ est Noël. Y sont pon complètemint innochints !!!
Mais in d’ sous, y’ a un truc bizarre : in/ne espèce eud photo in noir et blanc, in/ne espèce d’ oval comme un anneau d’ Saturne incliné et au mitan in/ne tâche plus claire, sans doute in/ne nouvelle planète… J’ ai pourtant pon l’ air d’ ête din la lune.
Y z’ ont même ajouté un tiot texte qui t’ parle du tiot Jésus din s’ crèche, et que jusque là, t’ éto père et qu’ d’un seul co te grandis, te va devenir grand…père.
Je n’ sus pon sûr qu’ in a un air très intelligent à ch’ momint là, mais y vaut miux avoir l’ air biète in société que d’ avoir l’ air malin tout seu din sin coin.
J’ sus sûr que din l’ salle y n’ a qui pinsent comme mi.
Din ches momints là in doit réagir tertous de l’ même façon, nous les hommes : in gonfle eul poitrine, in rinte sin vinte et in est tous fiers eud sin qui nous arriffe. In n’ y est pour rin, in tout cas pas plus que l’ homme de Cro-Magnon pour la naissance du premier vainqueur du Tour de France, mais in est tout fier.
Et in plus, in est malin. In a compris que chette photo ch’ éto in/ne « écolo-biographie » et que ch’ est l’premier portrait du prochain de la lignée.
Cha y’ est, les futurs parints, y sont là in face eud ti, tout contints d’leu z’ effets, les deux inventeurs de la génération suivante et qui font de vous un personnage de la troisième génération, qui vous font donc en douceur entrer dans le troisième âge.
Voilà, votre cadeau de Noël de l’ année est annoncé.
Il est né le divin pépé, buvons un coup, vidons ses boutelles !
Il est né le divin pépé, in est v’nu avec li l’ fêter !!!
Bien venu din l’ trosième génération, futur grand’père.
Pour preuffe que t’ es in train d’ vieillir, te v’là ému par des nouvelles comme in/ne vraie jon/ne fille et t’ écrasse in/ne tiote larme au coin de t’n’ eulle, alors que l’ année passée te n’ a pon brais quand ch’ est un copain qui t’ a annoncé qu’ il allo ête grand’père.
Et les autes, surtout la future manman, cha les fait rire eut’ n’ émotion.
Tout juste si in ne te dit pon qu’à t’n’ âche, ch ‘est un cadeau eud Noël plus utile qu’ in/ne console de jeu, qu’ au moins un tiot, te sais quemin qu’ cha fonctionne..
In/ne console, cha t’ auro pris des mois pour tout brancher, alors que là… cha va printe des mois avant qu’ y n’ arrive ch’tiot pépère ou cheule tiote mémère, in n’sait pon accor. De toute façon cha ne cangerot rin de l’ savoir et cha ne l’ fero pon v’nir plus vite.
In t’ print pour un athlète, in t’promet qu’y t’resse du temps pour eut préparer avant d’ ête grand-père puisque d’ après les calculs savants des espécialistes, ch’ l’ éfant y s’ ra là pour eul premier jour eud l’ été, le 21 juin.
Te va pon m’ dire qui z’ ont réfléchi in faisant cha pour eul l’ nuit eul plus courte eud l’ année, y n’ ont pon fini d’ avoir des nuits courtes.
Et pis, jusque là, eul 21 juin, ch’ éto eul jour de l’fête d’la musique, à ch’ t’ heure, cha s’ra eul jour de ch’ brailloux !!!
Jouez les crécelles et chantez la fanfare, v’là l’ été, v’là l’ bébé !!!
Un aute truc qu’ y n’ ont pon réfléchi : d’ pis qu’ in n’ a pu d’ éfants in bas âge, donc de moins de 18 ans puisqu’ in dit qu’ y mûrissent eud moins in moins vite, in profitot du mois d’ juin pour partir in vacances, les jours étotent plus longs et ch’ étot moins quière. Mais là, pour l’année prochaine, eul mos d’juin, ch’est foutu.
Pon question d’ pon ête là pour la naissance du divin enfant.
In est là tous les ans eul 25 décembre pour in tiot qu’ in a pon connu, pon puque qu’ ses parints qu’ in n’ a jamais rincontrés, alors pinsez un tiot peu eul bazar din l’ famille si in n’est pon là pour l’ arrivée au monte du premier de la génération suivante !!!
In y s’ ra, mais in s’ ra pon in vacances. Les congés payés in pourra toudis printe 30 jours intre le 1er et le 11 novembre, ou bien in n’ les prindra pon du tout, comme cha in travaillera puque pour dépinser puque… pour ch’ l’ éfant. Accor in/ne contre-preuve pour démontrer l’amélioration eud nou pouvoir d’achat.
Je n’ parle pon eud politique, je parle démographie, de m’ famille qui s’agrandit et d’ pouvoir d’ achat qui diminue.
Et tout cha, sans m’ plainte, ou si peu.
Rassurez-vous, quand y s’ra là ch’ tiot bébé, j’ n’ aurai pus l’ temps eud vous raconter eum’ vie, y va falloir apprinte à m’ servir de tous les modèles eud console eud jeu, j’ va devoir apprinte à invo/yer des messages eud’sus sin téléphone (si, si y va n’ avoir un très vite), j’ va essayer eud comprinte pour m’ servir d’ internet et d’tout un tas d’ trucs indispinsapes dont j’ pouvo m’ passer jusqu’à ch’t’heure…
Heureusemint qu’ y m’ ont prévenu assez vite, parce que mi, cha va m’ faire eud
l’ ouvrache !!!
Mes parints, y n’ ont pon eu à faire tout cha quand y ont su qu’ j’ arrivo au monte. Comme quoi les tiots y sont d’ plus en plus exigeants. Heureusemint qu’ in n’fait pont tous leu caprices !!!
Si vous l’ permettez, y m’ reste un tiot qué causse à dire, et ch’ est à li que j’ voudro l’ dire.
« EH, TIOT QUINQUIN, OU BIEN TI, TIOTE QUINQUINTE, DEPECHE-TE D’ARRIVER, TIN TIOT GRAN-PERE Y S’ENNUIE DEJA D’TI ET Y’A DES HISTOIRES A T’RACONTER »
FRANCIS WAEGEMACKER
ECRIT DE
Aucun commentaire:
Enregistrer un commentaire